Strålebehandling av brystkreft etter operasjon

Før strålebehandlinga startar, får du snakke med ein lege om kva område vi skal behandle og kor mange behandlingar du skal ha. Vi tar CT-undersøking av den delen av kroppen din som vi skal bestråle. CT-bilda bruker vi til å lage ein individuelt tilpassa strålebehandlingsplan (doseplan) for deg.

Dersom det blir bestemt at du skal ha pustestyrt strålebehandling, vil du få grundig opplæring og øving i dette før CT-undersøkinga.

Det er viktig at du ligg på same måte ved CT-undersøkinga og ved kvar strålebehandling. Derfor bruker vi armstøtter og spesialputer slik at heile kroppen din ligg stabilt. I tillegg teiknar vi inn innstillingsmerke med tusj på huda di, og tatoverer gjerne små hjelpemerke. Ver varsam med teikningane!

Kvar behandling varer i cirka 10–30 minutt. Mesteparten av tida bruker vi til å stille inn strålefelta. Sjølve strålinga varer berre nokre få minutt og er heilt smertefri. Det er viktig at du ligg heilt stille mens behandlinga skjer.

Nokon får strålebehandling berre mot brystet/brystveggen, mens andre i tillegg får strålebehandling mot nærliggande lymfeknutar (i armhole / langs sida av brystbeinet / rundt kragebeinet).

Vanlegvis gir vi 5 eller 15 strålebehandlingar. Dette kjem an på alder og kor omfattande kreftsjukdomen er.

Du skal ha strålebehandling éin gong per dag på kvardagar. For å oppnå optimal effekt av behandlinga er det viktig at du møter til kvar strålebehandling.

Pustestyrt strålebehandling

Pustestyrt strålebehandling er ein behandlingsteknikk som vi bruker for å redusere stråledosen til hjartet, og er derfor mest aktuell etter operasjon for venstresidig brystkreft. Strålebehandlinga blir da gitt mens du held pusten, og vi avbryt behandlinga kvar gong du har behov for å puste igjen.

Etter avslutta kreftbehandling vil dei fleste bli tilvist til vidare oppfølging ved lokalsjukehuset sitt, eller det sjukehuset der dei blei opererte.